This Cantonese article is archived. Check out the original article.
話說呢篇文我已經想寫好耐，但之前去咗做激光手術，跟住事業上又有咗變化，所以一直放埋咗一邊，直到最近醒起係時候update返手術嘅康復進度，加上又有少少多餘時間，就順便寫埋呢篇文當喺等個網無咁吉啦哈哈哈…
斷食法簡直終結咗我肥胖一生嘅詛咒！
其實斷食係歐美國家已經流行咗好幾年，係呢一兩年先係亞洲興起。我當初嘗試斷食主要係為咗減肥，結果一試減肥效果非常顯著，而且最重要嘅係keep到！
我一直都係肥妹仔，我係喺大概上年5月嘅時候開始進行斷食嘅，其實係大概1個月之後已經可以感受到身體嘅變化，2-3個月後更加係人哋+自己都睇到個身形轉變！到依家過咗1年都仲keep到，已經係我呢10幾年最瘦嘅磅數，而且斷食唔單單止淨係得減肥唯一嘅好處，對健康都仲好有益，有興趣想減肥同時改善健康靚住瘦嘅朋友真係要試下！
乜野係斷食？
斷食全名為間歇性斷食（英文 Intermittent Fasting），簡單一句，就係指係某一段時間內完全唔進食或飲含有熱量嘅飲品！咁時下成日聽到嘅16:8限時斷食就係指每日16個鐘唔食任何野（水、茶或咖啡OK），有啲人每日就唔啱時間會選擇5:2輕斷食，即係一星期入面有5日正常進食，其餘2日就控制係一個好低嘅卡路里，例如500咁。斷食嘅目的係等個身體有足夠嘅時間將葡萄糖完全消耗，轉而燃燒囤積咗體內嘅脂肪變成能量，堅持一段時間後，身體自然會將越黎越多嘅脂肪燃燒，咁就達到減肥嘅效果。
我嘅斷食大法
我最先接觸到嘅斷食法其實喺好多年前一個中文blogger（真係太耐，我搵唔返個blog?）寫嘅減肥歷程，呢位仁兄當時用嘅字眼唔係斷食，佢稱之為倒食法，以佢所講佢係夜晚嗰餐完全唔食，每日淨係食朝早同晏晝，結果最後瘦咗成個碼！當時我睇完無實行，因為當時嘅我係呀媽嘅管制下無可能晚晚唔食飯…直到近年自己一個人搬到嚟溫哥華住，無皇管之下終於可以一試斷食大法！
真係唔試尤至可，一試返唔到轉頭！我最初為咗想睇下效果明唔明顯，我嘅斷食間距基本為18:6，即18個鐘唔食野，每日係6個鐘內完成晒要食嘅野。我本身就唔係一個早起嘅人，所以唔食早餐對我黎講易過借火，咁淨低嘅困難就係午餐同晚餐嘅時間；我以前係香港，屋企人嘅食晚飯嘅時間都好遲，大概每晚9點先會開始食，所以我主要係要將我嘅晚餐時間推早。咁我因為工作關係，我朝早都係訓覺，平時朝早11點或者晏晝12點先會起身，所以如果由12點食午餐開始計，我必須要係6點鐘左右就要食完我嘅晚餐。有時放假我會再遲啲起身，2-3點先會食我嘅第一餐，咁我晚餐通常唔會推遲，都係喺大嘅6-7點就完成，所以我有時會有20個鐘斷食（20:4）。
而我食嘅野基本上無話特別咩唔食，基本上我都係想食咩就食，飯呀炸野都照食，但斷食咗幾星期後會發現自己胃口明顯細咗好多，一餐食嘅量最多係以前嘅7-8成（無刻意想食到7成飽，都係每餐食飽嘅，但食到嘅量就明顯比以前少）。但斷食咗一排之後我好似食慾都細咗，所以好多時（甚至直到近期幾乎已經變成新習慣）係一日1.5餐！嗰0.5餐點計出嚟？我會打沙律蔬菜汁就當晚餐，因為都唔係食但又有熱量喎我當佢半餐咁計啦！
過渡期／斷食時段選擇
由於一開始斷食總會經歷過渡期，例如夜晚特別會想食野、唔知work唔work會想放棄，所以堅持落去嘅信念好緊要！我我因為係選擇唔食夜晚嗰餐，所以初期夜晚會肚餓，而我發現如果斷食前最後時刻飲蘋果醋係會增加飽肚感，有聽過有啲人胃唔受得酸就會改食／飲奇異籽，目的都係增加飽肚感；另外，當有肚餓嘅感覺出現嘅時候盡量分散自己注意力，因為肚餓嘅感覺都係一陣陣，大概維持十多分鐘嘅時間，唔會持續幾粒鐘，捱過咗就又成功一步㗎啦！
另外你或者會覺得唔食夜晚嗰餐好難喎，例如屋企人壓力（驚你食少啲有厭食症）、要出去應酬社交等等，咁你可以改而唔食早餐，只要斷食時數足夠其實效果一樣，甚至有啲人會話呢種模式更乎合現代人嘅生活習慣，更易執行同維持。至於唔食早餐會傷身？越嚟越多研究支持唔食早餐更健康！早餐嘅英文break-fast，其實就係意思結束禁食，如果有限度嘅斷食係對身體有正面嘅影響，咁唔食早餐避免中止斷食發揮嘅作用係無問題嘅，只要你唔會因為無食早餐就嚴重影響到身體、生活、情緒等等就唔需要堅持食早餐啦！
咁我嘅戰績係點？
因為依家住緊嘅地方無磅，所以我無keep住check自己嘅體重變化，我知道自己嘅磅數已經係大概進行斷食後半年係公司磅嘅。
高峰130磅 ⇣ 到依家104左右 👏👏👏
呢個磅數係由我斷食前同斷食半年後嘅比較，直到依家1年後都係維持緊呢個磅數！足足瘦咗成26磅呀，你當唔係全部都係瘦脂肪都好，肯定嘅係外形上絕對睇得出嚟，有幾個月無見嘅朋友見到形容係瘦咗一圈，另外一啲朋友同我自己留意到嘅，我減到嘅地方主要係我下半身，大腿最明顯，跟住係手臂，而腰係有瘦到嘅，但個肚腩無想消失嘅意思…而我係另一道睇到關於男女減肥初期嘅身形變化分別，女性通常都係pat pat位同大腿，而男性就係腰圍，所以我諗我要個肚腩消失要再努力靠其他方法鍊返條腰線啦！
斷食係咪淨係減肥咁簡單？
係我一直修練斷食大法期間，尤其是初期，特別會想研究多啲斷食對身體嘅影響，係youtube上面我就搵到Cindy健康教練嘅片（主要國語+部份英文，部份有字幕），Cindy係美國嘅認可健康導師，會同大家分享佢對健康飲食嘅專業知識，而斷食就係佢特別關注嘅主題，有一系列嘅videos同大家講斷食嘅各種資訊，非常推介大家去睇下增廣見聞！係Cindy嘅角度，斷食➔減肥只係一個正面嘅副作用，並唔係斷食嘅主要功能！
自噬作用（Autophagy）
呢個係Cindy提到嘅主要功能，不過單靠斷食嘅話要人體需要至少大概18小時先會積極進行呢個作用。簡單而言就係細胞廢物回收！新嘅細胞將一啲老化咗細胞嘅分解同回收，清除一啲已經受損嘅蛋白質和細胞器（organelles），呢個過程可以減少感染疾病嘅機會，同時幫助延長壽命。如果配合埋良好嘅飲食（減少食垃圾同碳水化合物），更加可以有美容、降低血壓同增加肌肉嘅效果！
除咗Cindy，另一個我亦時時去聽去睇嘅係Dr. Eric Berg，佢有專屬嘅中文channel，有完整嘅中文字幕翻譯，以下嘅呢個video就好濃縮講斷食嘅主要好處：
所以斷食帶來嘅影響真係唔止減肥減脂咁簡單！睇晒呢篇文嘅你會唔會同我一樣都想信奉斷食大法？
