This Cantonese article is archived. More English contents are around and awaiting for you to discover!
特別更新：加拿大政府正式公佈香港人移民救生艇加拿大嘅計劃！係本文嘅最底同大家一齊睇下計劃資料！
作為本站第一篇文，我當然要用廣東話同大家打招呼，亦都希望紀錄返至今最重要嘅人生轉變。
作為一個土生土長嘅香港人，有生之年從未諗過移民。直到2017年經工作假期（Working Holiday）隻身嚟到楓葉國，係呢邊生活半年多之後就著手研究有咩途徑係呢邊攞居留權（Permanent Residency; PR），終於喺2020年年尾移民成功！
希望呢段親身移民血汗史可以俾大家一個參考，同埋介紹俾大家現時有啲咩移民加拿大嘅方法適合一般大眾。
我個移民路
長話短說，我係由：
- 經Working Holiday賺本地工作經驗
- 申請LMIA (Labour Market Impact Assessment) 同工簽再累積本地工作經驗
- 經EE (Express Entry) 以CEC (Canadian Experience Class) 申請移民
雖則我係由2017年年中過嚟，到2020年尾正式移民成功拎PR咭，但其實中間有1年時間係空窗期，個空窗期係我等緊LMIA結果前嘅等待期，實際前後用左1年時間累積夠工作經驗＋10個月嘅移民申請時間。
如果你問我有咩重要建議，咁一定係未到最後關頭唔好搵濕鳩移民顧問幫你搞、唔好搵濕鳩移民顧問幫你搞、唔好搵濕鳩移民顧問幫你搞！
我嘅理據：
- 【免費實用官方資料＋系統】加拿大政府嘅網站已經有好詳細嘅資料話你聽申請人要有咩條件、文件準則等等你要知道嘅資料，同埋最重要係有個網上申請嘅系統俾你用，根本就係預一般普通人用！而事實上我自己加上幾位身邊嘅朋友都係咁樣自己填申請表移民過黎，只要你唔係懶到出汁，花啲時間睇下資料，唔需要另外使錢請人幫你填表；
- 【假手於人嘅途徑一律好Ｌ貴】除咗本身顧問費小則１萬幾千，貴則幾萬幾十皮外，有啲sup 9移民顧問為咗賺更多嘅錢，會同一啲私校合作，介紹啲客去報佢哋嘅課程，然後同你講讀書移民啦，咁佢就可以食兩家茶飯，賺幫你搞移民嘅錢同你報課程嘅佣。但讀書移民係咪最適合你呢？如果你後生，未讀過大學嘅我覺得你或者可以考慮，但要注意呢邊留學生學費一啲都唔平，講緊4年學費連生活費基本都要幾十萬港紙埋單；如果你已經一把年紀，甚至已經成家立咗室，或者需要半工讀，讀書呢個方法只係踏腳石，唔係直接移民嘅途徑，讀完之後依然需要再搵移民嘅路徑，可苦呢？
【九流移民顧問靠害】我就係因為俾個癈顧問搞到我個LMIA失敗左1次，原因係一啲資料準備嘅低級錯誤 ，之後我係炒撚咗佢自己一手一腳搞移民申請嘅，自己搞肯定最上心，仲可以慳返啲非必要嘅使費，而且最終結果係成功嘅！
我依家講起都仲好撚嬲，浪費已經無乜嘅錢同青春！所以有能力絕對要試下自己有冇辦法搞到，移民請顧問唔係必須嘅！
咁一般香港人有咩途徑移民?
快速通道（Express Entry）
首選 Express Entry (EE；又名快速通道）！
EE有幾快？根據近幾年官方統計，由網上遞交咗申請至結果出爐平均半年就可以，而我本人用咗10個月係因為2020年COVID-19造成延遲，但比起其他例如省提名或者投資移民最少都要1年以上、平均2-3年嘅等候期依然明顯快唔少。
EE其實係一個統稱，細分有3類：FSW，CEC同FST。
- Federal Skilled Worker Program (FSW)：入池關鍵為須擁有至少1年海外工作經驗
- Canadian Experience Class (CEC)：入池關鍵為須擁有至少1年加拿大工作經驗
- Federal Skilled Trades Program (FST)：入池關鍵為任職項目為指定工種，語文要求比另外兩類低
呢個系統嘅分數計算方法都已經知道係俾邊類人申請：
- 年輕人：20-29歲最理想，之後每一年會少大約5分
- 高學歷：最少大學程度、碩士甚至博士學位最有優勢
- 英語／法文能力：以英文為例，IELTS最少每項分數要達到6，如果達到神奇關鍵密碼8777，你嘅分數會大幅提高
- 本地工作經驗：海外工作經驗基本上係無得分，無論工作1年定10年都係0分，但工作年數會影響最終分數加乘；加拿大本地工作經驗直接得分外同樣會影響最終分數加乘，所以基本上有本地經驗會大大提高分數，而我就係因為呢個決定因素得到移民邀請然後移民成功；要注意唔係所有職業嘅工作經驗都計
概括嚟講，就係後生可畏、英語／法語唔錯嘅專業人士，如果有埋一年本地經驗更佳！如果你符合以上條件，你絕對可以以好低嘅時間同金錢成本以EE申請移民，而事實上經EE系統係加拿大引入移民佔嘅最大比例。
省提名 (Provincial Nominee Program)
Provincial Nominee Program (PNP；省提名)，即係由省自己決定想收邊啲移民，呢個方式係省層面嘅，而EE係聯邦層面。
每一年省政府都有大概幾千個名額接受移民申請，普遍計分標準會比EE低少少，所以好適合喺EE一直唔達移民邀請分數嘅人，但相比EE以省提名方式直接移民所需嘅時間長好多，平均需要1年半至3年，所以有啲申請人會以EE+PNP嘅方式移民，即先申請及獲得省提名，然後再經EE系統加省提名嘅分數，從而達到EE移民邀請嘅分數經EE移民。
雖然PNP計分標準比EE低，但前提需要僱主擔保先可以申請，如果你本身無喺加拿大工作，一般係好難搵到本地公司擔保你移民，除非你係本地勞動市場缺乏嘅專才例如IT人、醫護等。
- 👉 PNP 省提名流程簡介
- 👉 British Columbia (BC省) PNP – BCPNP *港人移民大熱地點溫哥華就位於BC
- 👉 Ontario (ON省) PNP – OINP *另一個港人係加拿大嘅家鄉多倫多同首都渥太華都係喺ON
- 👉 Alberta (AB省) PNP – AINP *近年越黎越多人移民去嘅省，位於BC隔離
除咗以上3個省，其他省比較少人考慮，原因係要有無比嘅嘅勇氣！
大家應該知道加拿大基本上只有冬季同夏季，一年我諗有10-11個月都係寒冷天氣，就算係天氣比較宜人嘅溫哥華涷起上黎都可以去到零下幾度，可想而知北邊同內陸地區係幾咁涷，講緊係零下幾十度喎，你個冰格溫度都無咁低啦！
因為咁嘅原因，北邊非常少人移居過去，嚴重缺乏勞動人口，有見及此，北邊嘅省政府例如Yukon同Northwest Territories嘅PNP申請條件相比之下低好多，主要你表明勇士身份講下點解願意移居過去，有埋合法工簽／僱主擔保承諾你會留係當地最少一定年期就可以申請。
以上所講過嘅方法都有一個共同嘅問題，就係十分睇重加拿大嘅工作經驗或需要僱主擔保。
以EE為例，如果完全無本地經驗，就必須要有其他非常出眾嘅條件（年齡、學歷、英文／法文能力、特別項加分）先能夠達到移民邀請分數；而要拎到本地嘅工作經驗或者得到僱主擔保，先決條件係你要可以係加拿大合法工作，而且好可能係要拎住工作簽證賺嘅工時先可以計入EE/PNP，一般學簽嘅兼職工時／實習時數係不被接納計入EE/PNP嘅。
最簡單快捷拎到工簽嘅方法就係透過Working Holiday (WH)，但先提係你嘅年齡要符合申請WH嘅資格，而且香港同加拿大嘅WH計劃只有1年，唔能夠延長，換句話說你差唔多一落機就要搵到工，然後做足1年，每個禮拜做最少30小時，先至儲夠EE CEC嘅最低要求。
除左WH，基本上申請工簽嘅方法只有一個：就係先拎到LMIA，然後再申請工簽。
由於呢編文嘅主要目的係介紹移民方法，點樣申請LMIA我就唔詳細講啦，但有樣野大家要知道嘅係LMIA目的係要保護返加拿大本地嘅勞工市場，要通過一啲都唔容易，所以以LMIA申請工簽應該要留做後著。我當年完左WH只儲夠9個月嘅工作經驗，所以我無得揀只能夠通過LMIA拎工簽再儲工作經驗。
咁你就會問啦，咁我即係無乜其他機會拎到工簽過黎打工再移民啦？
只開放俾香港人嘅特別通道
開放式工簽申請 (Open Work Permit)
今次真係機遇黎！
因應香港近年變差嘅政治環境，加拿大政府決定俾香港人一個容易好多拎到工簽＋移民嘅機會！係2020年年底，加拿大政府公佈咗一個好滾動嘅政策：就係香港人只要係中學畢業後修畢大專課程後嘅5年內就可以申請1個為期3年嘅畢業簽。
畢業簽屬於開放式工簽 (Open Work Permit)，持有人可自由選擇僱主；相反LMIA下的工簽為封閉式工簽，只能為你申請工簽的公司工作，有不少工簽限制例如離職即失效，亦不能兼職其他公司嘅工作。
要知道畢業簽一般係留學生花幾十萬讀完合資格、為期最少2年嘅嘅加拿大本地大專課程先夠資格申請到！今次加拿大政府開放俾香港人嘅專用通道，除左學歷要求低咗，語言要求亦只要求達到最低要求即可，變相放寬咗香港人移民加拿大嘅資格，尤其受惠近年畢業於大專院校嘅香港年輕人。
依家由危變機，有興趣嘅朋友真係要諗諗啦！呢條只開放俾香港人嘅特別通道會係今年即2021年正式推出。
- 開放俾香港人申請移民的新聞稿
②條暫時嘅移民政策
嚟啦嚟啦！等到頸都長嘅政策詳情終於都嚟啦！
加拿大政府嘅最新新聞稿特別重提呢2項移民政策嘅起因和政策考慮，重有就當然係正式出爐2項移民政策嘅申請人資格、全家移民嘅條件、申請費用等等，而呢2項移民方法亦同其他一般移民方法有佢自己嘅專頁；目前呢項特別為香港人而設嘅移民政策由2021年6月1日至2026年8月31日生效：
- Stream A: In-Canada graduates（加拿大學校畢業生）
- Stream B: Canadian work experience（加拿大工作經驗類）
顧名思義，兩項嘅方法分別係到加拿大讀書以本地畢業生身份申請，或者喺加拿大工作最少一年以本地工作經驗移民，兩者只能兩揀一，而最基本都要要求申請人有香港特區護照或者BNO。
Stream A—學校畢業生
呢條路最大嘅優勢係完全唔需要任何工作經驗或者僱主擔保，好適合仲讀緊書或者就快畢業嘅後生仔女一路駁上去加拿大學校。
移民專頁入面列出最低門檻嘅合資格課程為2年制嘅大專課程，而最快為1年制專科／研究生課程／技能證書，咁當然大路但較高入學資格嘅大學本科、碩士同博士課程等等都包括在內，只不過要留意嘅係講到明要入讀同畢業於加拿大學校（唔能夠係香港本地或者其他海外學校），而由於要入讀本地嘅大專院校通常會有一定英文要求，所以只適合英文底子唔太差嘅港人。
Stream B—工作經驗類
呢條路同EE嘅CEC非常相似，唔同嘅地方在於語言條件降低同埋無咗工作工種（類別0AB）嘅限制。
同CEC一樣，工作經驗必須要係合法持有工簽嘅情況下先會計算，至於點樣申請工簽，可以睇返本文上面提過嘅LMIA封閉式工簽或者開放式工簽—香港人特別通道嘅介紹。
總結
或者你睇到呢到，已經發現我不斷強調加拿大本地工作經驗嘅重要性，除咗香港移民救生艇嘅Stream A可以完全唔需要任何工作經驗。
無錯，以我自己做嘅研究所得，無論邊種移民方法，無一不環繞本地工作經驗，絕大部份移民階段之前都要累積夠本地工作經驗，包活讀書移民（讀書 > 拎畢業簽 > 再做夠1-3年達到移民邀請分數），所以話加拿大工作經驗係一個好重要嘅移民踏腳石。
今年開始實施嘅香港特別移民通道令好多其他國家移民申請者十分葡萄，因為特別措施下港人能較輕易就可以拎到為期3年開放式工簽，機會好珍貴亦好難得！另外香港移民救生艇嘅Stream B亦降低咗申請門檻，所以有意移民加拿大嘅港人真係要把握機會依家就要計劃！
