保持口腔衛生：水牙線
Waterpik 水牙線雖然唔能夠完全取代傳統牙線，但對於戴緊鋼線箍、牙齒上有粒粒或者骨釘嘅朋友真係推介你試試！詳情可以睇我另一篇Waterpik水牙線機嘅介紹。
基本上我每晚喺刷牙後都會用水牙線清洗牙齦，非常有效咁清除食物殘渣！而且我買嘅型號仲有美白牙齒嘅功能，潔齒同時又美白，推薦大家入手！
箍牙嘅目的大部份都係為咗靚，但同時都要有一排健康白淨嘅牙配合仲完美，所以大家都唔好睇少口腔健康同美白牙齒嘅重要性呀！
洗箍神器
相信好多人都覺得洗箍好麻煩，重點係洗完仲要唔乾淨，我明，我真係明，因為我都係過來人。但後尾俾我搵到個正野，從此我無再手洗過個箍，而且仲要無晒啲積，用咗幾年嘅固定器同新嘅一樣！呢個神器就係 Magnasonic Ultrasonic Dental Cleaner（超聲波牙箍清洗器*）
部野細細部，唔會佔好多空間簡單易用，你只需要加水喉水到指定水位線，然後插電制，㩒個開關搞掂！部機會自己run 5分鐘，跟住你就會發現個箍靚仔晒！
如果你有全新嘅箍，唔好諗，快啲買部，因為會幫你慳力唔使浪費時間，我從來無手洗乾淨過，用刷用牙膏用洗假牙嘅野乜都用過都唔掂！
如果你個箍已經有積，都係建議買返部?，視乎啲積有幾多，可能要3-4次之後先會完全洗走晒啲積。但第一次用完我諗你都會睇到乾淨咗好多！
* 好可惜呢個特定嘅型號無再出，但同一廠家仲有其他型號可以買，例如呢款
呢部神器只需要清水就做到洗潔嘅作用，我已經用左1年有多，到依家個固定器都仲好新淨。除此之外，我每星期都會用保麗淨牙箍／固定器專用嘅清潔片劑做深層消毒。
無贊助 呢篇文無收到任何贊助 (sosad)，我澄清並•無•收•到•任何宣傳稿費或佣金，我係自費去買呢頁提及嘅產品／服務，係我自己嘅真實感受嚟。
