This Cantonese article is archived. Check out the original article.
我自認係一個好注重牙齒健康同潔白嘅人，自從幾年前做咗隱適美箍牙之後，我對啲牙嘅日常打理簡直升到lv999！
其實係箍牙嘅過程期間我已經有用牙線嘅習慣，如果你試過用牙線，你應該會發現即使平時幾認真刷牙，你嘅牙縫始終會夾住食物嘅殘渣（係每一次都梗有，每！一！次！” ），可想而知如果你從來冇清潔過你嘅牙縫，會有幾多細菌積咗係到…? 我自己以前好容易會積牙石同流牙血，即使無口臭同蛀牙，其實都代表牙齒唔太健康，自從用咗牙線之後，牙石同牙血嘅情況少咗好多，所以當你都開始咗用牙線之後你都會鍾意嗰種口腔乾淨嘅感覺，停唔到㗎啦！
咁你應該會問，我都已經用開牙線啦，咁點解仲要買部水牙線機呀？ 水牙線同傳統嘅牙線基本功能都係清潔牙刷掂唔到嘅牙縫，但水牙線有以下嘅好處：
- 你已經有牙石積聚嘅問題，擋住咗牙線嘅入口（牙線一般只能由上而下進入牙縫）；水牙線則可以多角度進入牙縫
- 你嘅牙肉發炎情況嚴重，用牙線嘅時候會覺得超痛好難受；水牙線則可以調到唔同嘅強度，最弱嘅度數特別適合牙肉好敏感嘅時候用
- 你發覺牙線咁啱用晒又趕唔切買
- 你箍緊牙或者有裝到一啲儀器係口腔以致用唔到牙線
係臨床實驗上顯示，Waterpik嘅水牙線可以做到傳統牙線9成嘅效果。水牙線最大嘅弱點係清潔唔到牙床（牙根同牙肉痴住嗰個位）嘅位置，而呢個位係最容易有細菌積聚嘅。但即使係咁，單純同牙刷比較，水牙線依然有一定優勢；Waterpik自己嘅數據顯示，佢自家嘅水牙線儀器比就咁用手刷多出25%嘅表面去漬效果，而且能99.9%清除射到去嘅位置嘅牙菌膜（即係有殺錯無放過，我鍾意佢嘅暴力），包括牙刷刷唔到嘅牙罅！ 另一方面，比起牙線，水牙線多出50%改善牙肉健康嘅效能＋ 清潔牙箍同植牙裝置嘅牙肉周圍健康高出2-3倍嘅效能！
雖然水牙線聽落係威係勢，但都要戴返頭盔先，水牙線並唔能夠直接取代傳統牙線嘅，起碼直到目前為止都無研究顯示水牙線能夠完完全全做到牙線全方位清潔牙齦嘅功用同效能。
不過又咁，數據係唔呃人嘅，如果再加上有美白牙齒嘅功能，聽落真係好吸引囉！如果你係牙控，你應該都會對呢部Waterpik儀器心動。咁當我決定入手嘅時候就開始留意價錢，最後決定係12月聖誕減價節喺London Drugs入手咗Waterpik美白水牙線（型號WF-06），當時嘅價錢係$69.99（未計稅同電子產品徵費，約港紙$400），而佢嘅一般售價係$99.99，大概600蚊港紙，依然比起香港行貨價要成千蚊平好多！
水牙線嘅基本使用方法介紹
水牙線嘅基本使用方法介紹（中文字幕），入面介紹嘅版本嘅Waterpik嘅經典Ultra版，雖然過咗咁多年，但Waterpik之後推出嘅所有型號都無乜大差別，係噴咀款式、設計、容量、強度調節等等都差唔多，呢個video入面就基本上講晒Waterpik配件同使用方法嘅介紹，簡而精。
Waterpik基本上每款水牙線機嘅功能同效用都大同少異，唯獨呢款有美白牙齒功能嘅型號比較特別，原因係佢嘅噴頭有一個位置俾你放入一粒嘅美白丸劑，當你開著沖牙嘅時候就會同時釋出美白丸嘅成份，令你清潔嘅同時亦能夠美白到牙齒。我買嘅型號本身已經包咗一個月分量30粒嘅美白丸，之後你可以另外購買，或者你亦可以唔用呢個丸劑，如常咁用佢返佢嘅水牙線基本功能。
美白丸劑替代版
（老翻）
我搵到一家呢WelDental嘅公司出版佢Waterpik嘅美白丸劑翻版，佢地本身都有自家嘅沖牙儀器同美白丸劑，要注意只有呢款WELTAB WT先係我買嘅型號適用；而呢款美白丸劑同時適用於另一款Waterpik Professional Whitening Water Flosser (WF-05)嘅型號。價錢上當然兩者有明顯分別啦！唔使講大家應該都知翻版都會平啲，如果唔係出翻版嚟做乜…
我用咗呢款儀器一年左右已經愛上咗佢，而且十分慶幸自己當初買咗佢，因為佢係維持牙齒同牙肉衛生上真係做得好好，我甚至將佢導咗俾我另外兩個同事，其中一個戴緊牙箍用咗都話好好用，因為佢平時完全清潔唔到鐵線周圍，水牙線就幫到手啦。
我自己除咗用佢做平常嘅清潔，仲發現咗佢嘅隱藏功能：清洗洗手盤邊邊嘅位！佢強大嘅水柱除霉去漬真係一流 ?
我覺得係亞洲包括香港，係口腔清潔上嘅意識都係比較薄弱，發覺身邊嘅人普遍都有唔同程度嘅牙齒健康問題，最容易發現人地有口腔問題就係口臭啦，而基中一個原因同市面上嘅潔齒產品種類同選擇唔多有一定關係。其實水牙線係外國唔係啲咩新科技，係一般嘅超市入面都可以隨便買到Waterpik或者其他型號，所以有唔少嘅外國人就算無擁有一部都會對水牙線有一定嘅認識，因為實在係好普及嘅牙齒保健儀器。如果身邊嘅人或者你都有有口腔衛生問題煩惱，不妨都入手買部或送禮！真心推介！
無贊助 呢篇文無收到任何贊助 (sosad)，我澄清並•無•收•到•任何宣傳稿費或佣金，我係自費去買呢頁提及嘅產品／服務，係我自己嘅真實感受嚟。
